ကျွန်ုပ်တို့အားလုံးမှာ ရှိထားကြတဲ့ တန်ဖိုးအကြီးဆုံးသော Asset ဆိုတာဟာ ကျွန်ုပ်တို့ ရဲ့ ဉာဏ်ပညာပဲ ဖြစ်ပါတယ်။ ကိုယ့် ဦးနှောက်ထဲကို သင်ကြားလေ့လာမှုတွေ ဖြည့်တင်းပေးနေရင် အခွင့်အခါသင့်တာနဲ့ ကြီးမားတဲ့ ချမ်းသာကြွယ်ဝမှုကို ဖန်တီးနိုင်ဖို့ အသင့်ဖြစ်နေစေမှာပါ။
The single most powerful asset we all have is our mind. If it is trained well, it can create enormous wealth in what seems to be an instant."
ချမ်းသာသော ဖေဖေ၊ ဆင်းရဲသော ဖေဖေ " စာအုပ်ကို ရေးသားသူ ရောဘတ်ကီယိုဆာကီ က ဒီလို ဆိုထားပါတယ်။
စီးပွားရေး မသေချာမရေရာမှုတွေ ရှိတဲ့အခါ၊ Inflation မြင့်တက်နေတဲ့အခါ၊ ပထဝီနိုင်ငံရေး မငြိမ်မသက်မှုတွေ ရှိတဲ့အခါ၊ စစ် ပွဲ ပဋိပက္ခတွေ ဖြစ်ပွားတဲ့ အချိန်ကာလတွေမျိုးမှာ လူအများစုဟာ သူတို့ရဲ့ ပိုင်ဆိုင်မှု တန်ဖိုးတွေကို ကျားကန်ထားနိုင်ဖို့ အိမ်ခြံမြေ၊ ရွှေ နဲ့ အခြားတွင်းထွက် ရတနာတွေ စတဲ့ Asset အမျိုးအစားတွေကို ဘယ်လို လက်ဝယ် စုဆောင်းထားရှိရမလဲ ဆိုတာကိုဘဲ တွေးပူတတ်ကြတယ်။
အဓိက ကျတဲ့ Asset တခုကိုတော့ မေ့လျော့နေတတ်ကြတယ်။ အဲဒါကတော့ "မိမိကိုယ်တိုင်ရဲ့ ဉာဏ်ပညာ" ပဲ ဖြစ်ပါတယ်။
မိမိတို့ ရဲ့ ဦးနှောက် ထဲကို ပညာရပ်တွေ၊ ဗဟုသုတတွေ ဆည်းပူးလေ့လာ ဖြည့်တင်းမှု အမြဲ မပြတ်လုပ်နေ သင့်ပါတယ်။ လူတယောက်ကို ပိတ်လှောင်ထားလို့ ရချင်ရနိုင်မယ်၊ လူတယောက်ရဲ့ လုပ်ရပ်တွေကို တားဆီးပိတ်ဆို့ထားလို့ ရချင်ရလိမ့်မယ်။ ထိုသူရဲ့ ဦးနှောက်ထဲမှာ ရှိနေတဲ့ ပညာနဲ့ အတွေးအခေါ်တွေကိုတော့ သွားပြီး ပိတ်ပင်တားဆီးလို မရနိုင်ပါဘူး။ ကိုယ့်ရဲ့ ဉာဏ်ပညာ Asset ကို ဘယ်သူကမှ ခိုးယူ၊ လုယူ၊ သိမ်းဆည်း ယူဆောင်သွားလို့ မရနိုင်ပါဘူး။
ကိုယ့်မှာ အသုံးချနိုင်တဲ့ အခွင့်အရေး မရှိသေးရင်တောင်မှ လေ့လာသင်ယူမှုတွေ ရှိထားမယ်ဆိုရင် အသုံးချလို့ ရတဲ့အချိန်အခါ ၊ အခွင့်အလမ်းပေါ်လာတဲ့ အခါမှာ ဥာဏ်ပညာနဲ့ အတွေးအခေါ်ကနေ ငွေကြေးနဲ့ ချမ်းသာကြွယ်ဝမှုကို ဖန်တီးလို့ ရနိုင်မှာ ဖြစ်ပါတယ်။
ကိုယ်ရောက်ရှိနေတဲ့ လုပ်ငန်းနယ်ပယ်က ပညာရပ်တွေကို တဆင့်ထက် တဆင့် မြှင့်မြှင့်သွားအောင် လေ့လာသင့်ယူမှုတွေကိုအဆက်မပြတ်လုပ်သင့်ပါတယ်။ အဲဒီအပြင် တသက်လုံး ပြောလို့ရ အသုံးချလို့ရနေမယ့် ဘာသာစကား (ဥပမာ Englishလို) ၊ အနာဂတ်မှာ ပိုပိုအဆင့်မြှင့်လာဖို့ပဲ ရှိနိုင်တဲ့ နည်းပညာ၊ နေ့စဉ်နေ့တိုင်း သုံးစွဲနေရတဲ့ ငွေကြေး နဲ့ ပတ်သက်တဲ့ ငွေရေးကြေးရေး ပညာရပ်တွေကိုလည်း လူတိုင်းလူတိုင်း လေ့လာ တတ်ကျွမ်းထားဖို့ လိုကို လိုအပ်ပါတယ်။
29. 7. 2023